Umfjöllun: Valur sigraði lánlausa Þróttara

Valsmenn tóku móti Þrótti á Vodafone-vellinum í kvöld. Fyrir leikinn voru Valsmenn í sjöunda sæti með sjö stig en Þróttarar á botninum með einungis tvö stig.

Willum Þór Þórsson mætti til leiks með óbreytt lið frá sigrinum gegn Fram í síðustu umferð en Gunnar Oddsson setti Jón Ragnar inn fyrir Davíð Þór Rúnarsson. Hann hafði hinsvegar breytt uppstillingu liðisins. Hann hafði sett Dennis Danry upp á miðju úr miðverði og Hauk Pál Sigurðsson niður í miðvörð. Jón Ragnar sem kom inn í liðið í kvöld lék á hægri kanti.

Strax á fyrstu mínútu komust Valsmenn í sæmilegt færi þegar Guðmundur Steinn Hafsteinsson komst að marki Þróttara en skot hans fór framhjá.

Næstu mínútur voru í rólegri kantinum. Einhver hálffæri litu dagsins ljós en ekkert sem fékk hjörtu áhorfenda til að slá örar. Þróttarar voru þó atkvæðameiri og fengu aukaspyrnu á stórhættulegum stað á 23. mínútu. Rafn Andri Haraldsson tók spyrnuna sem fór af varnarmanni Vals í horn.

Eftir aukaspyrnuna sóttu Valsmenn í sig veðrið en náðu ekki að skapa sér nægilega hættuleg færi. Á 30. mínútu dró svo til tíðinda þegar Guðmundur Viðar Mete felldi Rafn Andra Haraldsson inni í teig og dæmdi dómari leiksins Eyjólfur M. Kristinsson vítaspyrnu. Einhverjir vildu sjá Guðmund fá gult spjald að launum en Eyjólfur sleppti Guðmundi undan því en hann hafði fengið spjald fyrr í leiknum. Dennis Danry fór á punktinn og skoraði af miklu öryggi. Þróttarar því komnir með eitt mark í forskot.

Þróttur var ekki lengi í paradís því það tók Valsmenn um mínútu að jafna metin. Þar var á ferðinni Ólafur Páll Snorrason sem setti boltann í markið eftir vandræðagang í vörn Þróttar.

Eftir þetta sóttu Valsmenn án afláts og máttu Þróttarar taka á honum stóra sínum til að verjast sóknum Valsmanna. Á 36. mínútu urðu Þróttar svo fyrir áfalli þegar Runólfur Sveinn Sigmundsson ætlaði að senda boltann til baka á markvörð Þróttar en sendingin var arfaslök og stutt. Helgi Sigurðsson náði boltanum og sá Runólfur þann kost vænstan að fella Helga og fékk beint rautt spjald að launum.

Það sem eftir lifði hálfleiks sóttu Valsmenn af krafti en Þróttarar náðu að halda fengnum hlut fram að hálfleik.

Valsmenn komu grimmir til leiks í síðari hálfleiks og sóttu án afláts. Þróttarar voru þó fastir fyrir og greinilega staðráðnir í að halda fengnum hlut manni færri. Valsmenn voru meirihluta hálfleiksins með boltann en náðu ekki að skapa sér nægilega hættuleg færi.

Á 61. mínútu fékk Ólafur Páll Snorrason opið skotfæri í teig Þróttara en dúndraði boltanum í slá. Þróttarar heppnir þar.

Næstu mínútur voru ekki svo ýkja skemmtilegar. Valsmenn sendu boltann milli sín en Þróttarar voru fastir fyrir. Stíflan brast þó á endanum þegar Sigurbjörn Hreiðarsson átti skot rétt utan vítateigs sem hafði viðkomu í varnarmanni og þaðan niður í vinstra markhornið. Valsmenn því komnir verðskuldað yfir ef litið er tíl tíma á bolta.

Á 84. mínútu komst Viktor Unnar Illugason í gott færi en Sindri Snær Jensson í marki Þróttara greip nokkuð fast skot hans.

Síðustu mínúturnar sóttu Þróttarar eilítið í sig veðrið og freistuðu þess að ræna stigi á Hlíðarenda en allt kom fyrir ekki. Valssigur staðreynd.



Valur - Þróttur 2-1

0-1 Dennis Danry (30.mín)

1-1 Ólafur Páll Snorrason (31.mín)

2-1 Sigurbjörn Hreiðarsson (73.mín)

Vodafonevöllur. Áhorfendur: 973

Dómari: Eyjólfur M. Kristinsson (5)

Skot (á mark): 7-5 (4-2)

Varin skot: Haraldur 0 - Sindri Snær 5.

Horn: 9-2

Aukaspyrnur fengnar: 10-9

Rangstöður: 2-0

Valur (4-4-2)

Haraldur Björnsson 5

Steinþór Gíslason 5

Atli Sveinn Þórarinsson 6

Guðmundur Viðar Mete 6

Bjarni Ólafur Eiríksson 6

Ólafur Páll Snorrason 6

Ian Jeffs 6

Sigurbjörn Hreiðarsson 6

Hafþór Ægir Vilhjálmsson 4

(55. Viktor Unnar Illugason 4)

Guðmundur Steinn Hafsteinsson 4

(27. Helgi Sigurðsson 7) Maður leiksins

Marel Jóhann Baldvinsson 7

Þróttur (4-5-1)

Sindri Snær Jensson 6

Kristján Ómar Björnsson 6

Runólfur Sveinn Sigmundsson 3

Haukur Páll Sigurðsson 6

Birkir Pálsson 5

Jón Ragnar Jónsson 5

Dennis Danry 6

Hallur Hallsson 5

Rafn Andri Haraldsson 6

(75. Davíð Þór Rúnarsson -)

Magnús Már Lúðvíksson 6

(39. Hjörtur Júlíus Hjartarson 5)

Morten Smidt 6

(87. Andrés Vilhjálmsson -)

Leiknum var lýst á boltavakt Vísis. Valur - Þróttur.