Willum: Verð að hrósa mínu liði

Willum Þór Þórsson var kátur eftir 2-1 sigur sinna manna gegn Þrótti fyrr í kvöld.

„Maður er aldrei rólegur," sagði Willum aðspurður hvort hann hafi verið farinn að óttast að jafntefli yrði niðurstaðan

„Ég horfði á Þróttaraliðið ekki alls fyrir löngu spila mjög skipulagðan og agaðan varnarleik gegn KR, gerðu það mjög vel. Ég ber mikla virðingu fyrir Þrótturunum þeir komu hér og pressuðu okkur framarlega. Opnuðu leikinn og komu okkur á óvart. Við náum okkur síðan vel á strik í seinni hálfleik og fannst við hafa átt að gera betur í sóknarfærunum okkar í fyrri hálfleik. Svo gekk mikið á, þetta fór teiga á milli. Víti, síðan Helgi í gegn og þeir manni færri, þá verða þeir ennþá erfiðari, pakka og þétta," sagði Willum.

Willun var að vonum sáttur við sína menn. „Ég verð að hrósa mínu liði fyrir að sýna þolinmæði og ná þessum tveimur mörkum. Það er ekkert auðvelt í þessari deild að lenda undir. Við erum búnir að gera í þremur síðustu leikjum. Koma til baka og ná sjö af níu stigum.Það eru náttúrulega bara alvöru fótboltalið sem gera svoleiðis."

Helgi Sigurðsson kom inná fyrir Guðmund Stein Hafsteinsson eftir einungis rúmar 26 mínútur og stóð sig frábærlega. „Helgi kom hungraður inn," sagði Willum. „Hann er bara búinn að vera í brasi með bakið á sér, verið stífur og við þurfum aðeins að lappa upp á kallinn. Gott að fá hann inn. Í lokin barðist hann manna mest við að halda þessu."

Willum var spilandi þjálfari Þróttar undir lok síðustu aldar. Aðspurður hvort enginn tregi hefði verið í honum að skella gömlu félögunum svaraði hann hlæjandi: „Nei nei, við þurfum á þessum stigum að halda. Þetta er bardagadeild."