West Ham bjargaði stigi á móti tíu manna liði Fulham

West Ham fór illa með gott tækifæri til að koma sér upp úr fallsæti í ensku úrvalsdeildinni þegar liðið mátti þakka fyrir 2-2 jafntefli á móti Fulham í dag. West Ham liðið komst í 1-0 og lék manni fleiri frá 40. mínútu. Everton og Stoke gerðu 1-1 jafntefli á sama tíma.

West Ham átti samt skilið að fá eitthvað út leiknum og það var Junior Stanislas sem tryggði West Ham jafntefli með marki í uppbótartíma. Carlton Cole kom West Ham í 1-0 á 16. mínútu og Kagisho Dikgacoi fékk síðan rauða spjaldið á 40. mínútu í sínum fyrsta leik í byrjunarliði Fulham.

Matthew Upson, varnarmaður West Ham, varð síðan fyrir því óláni að fella Diomansy Kamara innan vítateigs á 47. mínútu og Danny Murphy jafnaði leikinn úr vítinu. Murphy lagði síðan upp annað mark Fulham sem Zoltan Gera skoraði á 57. mínútu.

Everton og Stoke gerðu 1-1 jafntefli á Goodison Park þar sem bæði mörkin komu á fimm mínútna kafla í upphafi seinni halfleiks. Robert Huth kom Stoke yfir með skallamarki eftir horn en Leon Osman jafnaði metin með fallegu marki.