Ferguson: Hargreaves er eins og nýr leikmaður fyrir okkur

Knattspyrnustjórinn Sir Alex Ferguson hjá Englandsmeisturum Manchester United getur vart beðið eftir því að miðjumaðurinn Owen Hargreaves snúi aftur til æfinga með félaginu en hann hefur verið lengi frá vegna hnémeiðsla.

Ferguson segir þó að enska landsliðsmanninum verði gefinn tími til þess að ná sér að fullu áður en hann byrjar að spila með liðinu, sama hversu langan tíma það taki.

„Það mikilvæga í þessu er að Owen nái sér að fullu af meiðslunum. Við munum því passa vel upp á það að láta hann ekki spila fyrr en hann er orðinn hundrað prósent heill heilsu. Þegar hann er klár í slaginn er ljóst að hann mun styrkja liðið verulega og þetta verður eins og að fá nýjan leikmann fyrir okkur," segir Ferguson.