Heiðar sagður á leið til Watford

Heiðar Helguson er sagður á leið til Watford í enskum fjölmiðlum í dag en hann er nú á mála hjá Queen's Park Rangers.

Heiðar lék með Watford í sex ár áður en fór frá félaginu árið 2005. Síðan þá hefur hann leikið með Fulham, Bolton og QPR en aldrei náð sér almennilega á strik, til að mynda vegna tíðra meiðsla.

Hann var hins vegar lykilmaður í liði Watford á sínum tíma og svo virðist sem að Jim Magilton, stjóri QPR, sé reiðubúin að leyfa honum að fara frá félaginu, eftir því sem fram kemur í frétt Sky Sports um málið.

Heiðar var einnig orðaður við Middlesbrough en líklegra þykir að hann fari til Watford. Um lánssamning væri að ræða.