Blake: Annað hvort fer boltinn upp í sætaröð z eða í markið

Framherjinn Robbie Blake hjá Burnley stal senunni í fræknum 1-0 sigri liðsins gegn Englandsmeisturum Manchester United á Turf Moor-leikvanginum í gærkvöld en mark hans var einkar glæsilegt.

Hinn 33 ára gamli Blake gerði sér lítið fyrir og þrumaði boltanum viðstöðulaust á lofti á nærstöngina framhjá varnarlausum Ben Foster í marki United.

„Þetta er nú bara náttúrulegur hlutur. Þú þarft bara að hafa augun á boltanum og láta vaða á réttum tíma. Annað hvort lendir hann lengst upp í röð Z í stúkunni eða þá í markinu. Sem betur fer fór boltinn í markið í þetta skiptið," segir Blake.

„Það var skemmtilegt að þagga niður í ákveðnum aðilum sem eru ekki búnir að gefa okkur neinn möguleika á að sanna okkur í deildinni. Flestir virðast bara gera ráð fyrir því að við föllum en þessi úrslit gætu orðið til þess að breyta því. Við skulum sjá til hvort að við náum ekki fleiri jákvæðum úrslitum á næstu vikum."