Willum til í að skoða það sem býðst

Willum Þór Þórsson segist vera tilbúinn að skoða það ef stjórn Þróttar myndi hafa áhuga á að fá sig sem þjálfara.

„Ég hef mjög gaman að því að starfa við þjálfun og ég er alveg opinn fyrir því að skoða það sem býðst. Annars er ekkert að frétta af mínum málum og fjölskyldan hefur verið í forgangi hjá mér," sagði Willum við Vísi.

Willum hefur verið orðaður við þjálfarastöðuna hjá Þrótti en hann hætti sem þjálfari Vals fyrir nokkrum vikum. „Ég veit samt ekki betur en að Gunnar Oddsson sé þjálfari Þróttar og ég sá mynd af honum í Fréttablaðinu í dag vera að stýra æfingu. En ef staða mála breytist eitthvað hjá þeim þá er það eitthvað sem má alveg skoða," sagði Willum.