Páll Einarsson: Ég verð áfram í Árbæ

Allt útlit er fyrir að Gunnar Oddsson hafi stýrt sínum síðasta leik með Þrótti. Þegar eru komin nokkur nöfn í umræðuna þegar rætt er um hver taki við stjórnartaumunum í Laugardal. Eitt af þeim nöfnum er Páll Einarsson, fyrrum fyrirliði Þróttar og núverandi aðstoðarmaður Ólafs Þórðarsonar hjá Fylki.

„Mér finnst ekkert skrýtið að verið sé að orða mig við þetta starf. Ég var í Þrótti í 20 ár," sagði Páll Einarsson við Vísi en hann sagði þó ljóst að hann yrði ekki næsti þjálfari liðsins. „Ég hef ekkert heyrt í Þrótti og ég er ekki á leið þangað. Það er alveg klárt.

Fylkismenn hafa komið á óvart í sumar og sitja í þriðja sæti Pepsi-deildarinnar. „Það hefur gengið mjög vel hjá okkur í Árbænum. Það er verkefni sem maður er búinn að taka að sér og maður klárar það bara vel. Við erum ánægðir með árangurinn og ég var áfram hér," sagði Páll.

Zoran Miljkovic, þjálfari Selfyssinga í fyrra, hefur einnig verið orðaður við starfið. Hann lýsti yfir áhuga á starfinu í samtali við vefsíðu Morgunblaðsins en hefur ekkert heyrt í stjórn Þróttar. Gunnar Guðmundsson, fyrrum þjálfari HK, og Marko Tanasic, sem hætti hjá Njarðvík fyrir skömmu, hafa einnig verið nefndir.