Chelsea afgreiddi Burnley á sjö mínútum

Frábær byrjun Chelsea í ensku úrvalsdeildinni hélt áfram í dag þegar liðið vann sinn fjórða leik í röð. Fórnarlamb Chelsea að þessu sinni var Burnley.

Eftir smá basl framan af leik afgreiddi Chelsea leikinn á sjö mínútna kafla. Nicolas Anelka kom þeim yfir rétt fyrir lok fyrri hálfleiks sem var talsvert kjaftshögg fyrir Burnley.

Í upphafi síðari hálfleiks bætti Michael Ballack marki við fyrir Chelsea og sló vopnin úr höndum Burnley.

Á 52. mínútu var síðan komið að Ashley Cole sem skoraði fallegt mark og endanlega drap alla mótspyrnu frá nýliðunum.

Leikmenn Chelsea fengu fjölda færa til að bæta við forskotið en tókst ekki að skora fleiri mörk.

Jóhannes Karl Guðjónsson spilaði síðasta hálftímann í leiknum.

Staðan í ensku úrvalsdeildinni.