Wenger: Vissi ekki að væri bannað að sparka í vatnsbrúsa

Arsene Wenger, stjóri Arsenal, var svekktur í leikslok og ekki síst fyrir þær sakir að mark var dæmt af Arsenal í uppbótartíma í leik þeirra gegn Man. Utd.

Hann reiddist mjög við þann dóm og var sendur upp í stúku af dómara leiksins, Mike Dean.

„Ég var rekinn af velli þar sem ég sparkaði i vatnsbrúsa þegar markið var dæmt af. Ég vissi ekki að það væri bannað að sparka í brúsana," sagði Wenger um ástæðu þess að honum var vísað af velli.

„Við förum heim stigalausir og það er mjög svekkjandi. Það er erfitt að taka því að spila svona vel en standa ekki uppi með neitt," sagði Wenger sem reyndi að tjá sig sem minnst um dómarann.

„Maður veit hvað bíður manns er maður kemur á Old Trafford. Ég vil samt ekki tala um dómarann. Ef þið hafið spurningar um dómarann spyrjið þá einhvern annan en mig."