Diaby færði United sigur á silfurfati

Ferðalagið hjá Abou Diaby frá Manchester til London á eftir að verða langt. Glórulaust sjálfsmark leikmannsins á Old Trafford í dag færði Man. Utd 2-1 sigur á Arsenal í skemmtilegum leik.

Andrey Arshavin kom Arsenal yfir með stórkostlegu marki í fyrri hálfleik. Skaut nánast í kyrrstöðu, firnaföstu skoti efst í nærhornið. Ben Foster var þrátt fyrir það ekki vel staðsettur og hefði hugsanlega átt að gera betur. Skotið engu að síður glæsilegt.

Arsenal var sprækara liðið lengstum og byrjaði síðari hálfleikinn með miklum látum. Sóknarleikur liðsins augnakonfekt og annað mark þeirra lá í loftinu.

Þá braut Almunia markvörður á Rooney og United átti möguleika að komast aftur inn í leikinn. Rooney tók vítið sjálfur og skoraði örugglega úr því.

Ekki löngu síðar átti United ágæta sókn, sending af kantinum í teiginn sem fann aðeins Abou Diaby, leikmann Arsenal. Hann var einn, ekki undir neinni pressu og gat í raun gert allt sem hann vildi.

Hann tók þá stórfurðulegu ákvörðun að stanga boltann í eigið mark. Óskiljanlegt með öllu en leikmenn United fögnuðu þvi eðlilega að vera komnir yfir.

Diaby gat bætt fyrir mistökin skömmu síðar er hann komst einn í gegnum vörn United en skot hans fór fram hjá markinu.

Sóknarlotur Arsenal urðu veikari eftir þetta. Berbatov og Nani hefðu getað bætt við mörkum fyrir United í uppbótartíma en báðir voru klaufar að skora ekki.

Fimm mínútum var bætt við leikinn og þegar uppbótartíminn var rúmlega búinn skoraði Van Persie. Markið var dæmt af vegna rangstöðu.

Arsene Wenger varð brjálaður á hliðarlínunni og var vísað af velli. Skrautlegur endir á skrautlegum leik.