Wolves hefur kært Bolton til enska knattspyrnusambandsins

Bolton gekk frá kaupum á hinum sautján ára gamla Mark Connolly frá Wolves á eina milljón punda á lokadegi félagaskiptaglggans í sumar en svo virðist vera sem ekki hafi allt verið með felldu varðandi félagaskiptin.

Wolves hefur nú kært Bolton til enska knattspyrnusambandsins og stjórnar ensku úrvalsdeildarinnar fyrir að hafa talað við leikmanninn þegar hann var samningsbundinn Wolves í leyfisleysi.

Kæran beinist sérstaklega að aðstoðarstjóranum Chris Evans hjá Bolton sem var áður yfirmaður yngri flokka starfs hjá Wolves.

„Þetta snýst ekki um peninga eða bætur sem við fengum fyrir leikmanninn heldur snýst þetta um að við misstum leikmann sem við vildum ekki missa og við viljum því verja yngri flokka starf félagsins og sjá til þess að þetta gerist ekki aftur," segir í yfirlýsingu frá Wolves. Enn sem komið er hefur ekkert borist frá herbúðum Bolton varðandi málið.