Chelsea vann 2-0 sigur á Liverpool og fór aftur á toppinn

Didier Drogba lagði upp bæði mörk Chelsea í 2-0 sigri á Liverpool í stórleik ensku úrvalsdeildarinnar í dag. Það voru Frakkarnir Nicolas Anelka og Florent Malouda sem skoruðu mörkin en Chelsea komst aftur í toppsætið með sigrinum.

Nicolas Anelka  skoraði fyrra markið á 59. mínútu af stuttu færi eftir frábæran undirbúning frá Didier Drogba og Florent Malouda gerði það síðara af enn styttra færi í uppbótartíma eftir að Drogba hafði farið illa með Liverpool-vörnina.

Chelsea er því komið með 21 stig, tveimur stigum meira en Manchester United sem var í efsta sæti fyrir leiki helgarinnar og sex stigum meira en Liverpool sem missti bæði Tottenham og Arsenal upp fyrir sig um helgina.