Hólmar Örn: Ekkert jákvætt hægt að taka úr þessum leik

Hólmar Örn Rúnarsson fyrirliði Keflvíkinga segir að 5-0 sigur Framara í kvöld hafi verið sanngjarn. "Við vorum bara kafsigldir. Það var allt loft úr okkur eftir að þeir settu þriðja markið og þeir voru einfaldlega betri í dag.

Keflvíkingar byrjuðu ágætlega að mati Hólmars sem fengu svo tvö mörk í andlitið með stuttu millibili.

"Við vorum að láta boltann rúlla ágætlega fyrstu mínúturnar fannst mér. Svo koma þeir og skora úr tveimur fyrstu sóknum sínum. Það var bara algjört kjaftshögg".

Keflvíkingar reyndu hvað þeir gátu til að komast aftur inn í leikinn en eftir góðan kafla þeirra í upphafi seinni hálfleiks kláruðu Framarar í raun leikinn með því að setja þriðja markið.

Við teljum okkur vera með ágætis knattspyrnulið og við eigum að geta komið tilbaka í svona leikjum. Það var það sem við ætluðum okkur í seinni hálfleik þegar staðan var 2-0. Svo skitum við bara á okkur og öll trú á þetta hvarf þegar við fengum á okkur þriðja markið.

Er hægt að taka eitthvað jákvætt úr þessum leik?

"Nei."