AC Milan komið í kapphlaupið um Pavlyuchenko

Fastlega er búist við því að rússneski landsliðsframherjinn Roman Pavlyuchenko yfirgefi herbúðir Tottenham þegar félagaskiptaglugginn opnar í janúar.

Pavlyuchenko hefur ekki náð að festa sig í sessi hjá Tottenham eftir um árs dvöl og fallið aftar í goggunarröðina eftir endurkomu Robbie Keane og kaup Tottenham á Peter Crouch í sumar.

Zenit frá Pétursborg hefur áhuga á Pavlyuchenko en AC Milan er samkvæmt Daily Star einnig að fylgjast náið með gangi mála hjá Rússanum.

Tottenham borgaði um 14 milljónir punda fyrir Pavlyuchenko og var honum ætlað að leysa Dimitar Berbatov af hólmi á White Hart Lane.