Misrétti gegn rauðhærðum sjaldan tekið alvarlega

Íslenskufræðingurinn Esther Ösp Gunnarsdóttir segir misrétti gegn rauðhærðum sjaldnast tekið alvarlega. Sjálf er hún rauðhærð, fjölskyldan og kærastinn líka. Þar að auki þá skrifaði hún B.A. ritgerð í íslensku um rauðhærðar sögupersónur í barnabókum. Esther hefur meira að það segja prentað boli fyrir rauðhærða auk þess sem hún ásamt fjölskyldu halda úti síðunni, rauðhausar.com.

Á Facebook er hvatt til þess að fólk taki þátt í svokölluðum „Kick a ginger day". Það mætti þýða sem: „Spörkum í rauðhærða-dagurinn".

Samtök Heimilis og skóla hafa sent út tilkynningu þar sem yfirvöld eru beðin um að taka hart á slíku framferði. Þá hafa skólastjórnendur í Kópavogi sent foreldrum bréf vegna málsins og þau hvött til þess að fræða börnin sín.

Í fjölmiðlum hefur komið fram að dagurinn hafi sprottið upp vegna Southpark-þáttar sem var sýndur fyrir allnokkru. Hann gekk út á að ein sögupersónan fór í nánast heilagt stríð við rauðhærða í bænum og sagði þá sálarlausa.

Esther bendir hinsvegar á að dagurinn eigi sér eldri rætur. Í Bretlandi kallast dagurinn „Gingers bashing day" eða „lúberjum rauðhærða-dagurinn". Sá dagur er enn haldin hátíðlegur í minnst einum framhaldsskóla í Bretlandi.

„Þetta eru frekar undarlegt viðbrögð hjá þjóð sem telur 15 prósent rauðhærðra," segir Esther en Bretar eiga hæsta hlutfall rauðhærðra í heiminum.

Esther skrifaði ritgerð um rauðhærðar kjarnakonur í fjórum barnasögum. Það er að segja, Línu Langsokk, Fríðu framhleypnu, Önnu í Grænuhlíð og svo Sossu sólskinsbarn.

„Þær eiga það sameiginlegt að vera ákveðnar, hugmyndaríkar, framhleypnar og dálítið sérstakar," segir Esther sem segist sjálf hafa fundið fyrir nokkurskonar fordómum vegna hárlitarins eins og flestir rauðhærðir að hennar sögn. Henni var strítt þegar hún var lítil, „en sjálf er ég mjög ákveðin þannig það hætti mjög fljótlega."

Hún segir alla þá sem eru rauðhærðir vera mjög meðvitaðir um hárlitinn. Hann móti þá frekar sem persónur heldur en þegar einstaklingar eru dökkhærðir eða ljóshærðir.

„Misrétti gagnvart rauðhærðum er sjaldnast tekið alvarlega," segir Esther og bendir á að ef dagurinn hefði heitið til að mynda: Spörkum í samkynhneigða-dagurinn. Eða: Spörkum í svarta-dagurinn. Þá yrði málið væntanlega lögreglumál fljótlega.

„En það er gott að það sé verið að fjalla um þetta. Foreldrar þurfa náttúrulega að ræða almennt við börn um ofbeldi, þá ekki bara gegn rauðhærðum," segir Esther að lokum.