Newcastle á höttunum eftir Sölva Geir

Danskir fjölmiðlar greina frá því í dag að b-deildarfélagið Newcastle á Englandi hafi áhuga á að fá landsliðsmanninn íslenska Sölva Geir Ottesen í sínar raðir.

Sölvi Geir leikur með SønderjyskE í Danmörku og hefur verið sterklega orðaður við félög í Bretlandi í sumar, til að mynda Celtic og Birmingham, en Guðlaugur Tómasson, umboðsmaður Sölva Geirs, segir Newcastle þó ekki búið að leggja fram kauptilboð að svo stöddu.

„Það er ekki komið kauptilboð á borðið en Newcastle hefur líst yfir áhuga sínum á Sölva. Á þessum tímapunkti er erfitt að segja hvort eitthvað gerist en við skulum sjá til," er haft eftir Guðlaugi í viðtali við Berlinske Tidene.

Samkvæmt heimildum blaðsins sér Newcastle hinn 25 ára gamla Sölva Geir sem góðan kost til þess að fylla skarð Sebastien Bassong sem fór á dögunum til Tottenham.