England rúllaði yfir Króatíu

Enska landsliðið er enn með fullt hús stiga í undankeppni HM en það rúllaði yfir Króatíu 5-1 í kvöld. Steven Gerrrard og Frank Lampard skoruðu tvö mörk hvor.

England hefur leikið átta leiki í riðli sínum og eiga tvo eftir. Frank Lampard kom liðinu yfir snemma leiks úr vítaspyrnu sem dæmd var eftir að brotið var á Aaron Lennon.

Gerrard skoraði annað mark leiksins og staðan 2-0 í hálfleik. Lampard og Gerrard bættu síðan við skallamörkum áður en Króatía minnkaði muninn. Wayne Rooney rak síðan síðasta naglann eftir hræðileg varnarmistök.

Englendingar hafa farið léttilega í gegnum riðil sinn og verða svo sannarlega til staðar á heimsmeistaramótinu á næsta ári.