Prince Rajcomar skellti sér á Þjóðhátíð í Eyjum

Sóknarmaðurinn Prince Rajcomar hjá KR lék ekki með liðinu gegn Val á sunnudagskvöld. Fram kom í fjölmiðlum að hann væri farinn út til reynslu hjá MK Dons í Englandi. Það kom því mörgum gestum Þjóðhátíðar í Eyjum á óvart að sjá leikmanninn á hátíðinni.

Rúnar Kristinsson, yfirmaður knattspyrnumála hjá KR, segir að félagið hafi vitað að Prince hafi verið í Vestmannaeyjum en hann hafi ætlað til Englands á sunnudeginum.

„Hann átti að fara til Englands á sunnudaginn held ég. Mér skilst á honum að hann hafi bara farið í dagsferð til Eyja á laugardaginn. Hann vildi skoða Vestmannaeyjar og ætlaði síðan á sunnudeginum til Englands. Ég veit ekki meira, þetta er eitthvað sem við höfum ekki haft áhyggjur af," sagði Rúnar en hann hefur ekkert heyrt frá leikmanninum síðan um helgina.

Samkvæmt heimildarmönnum Vísis sást Prince þó einnig í brekkunni í Vestmannaeyjum á sunnudagskvöldinu.

„Honum er frjálst að fara til Vestmannaeyja ef hann vill. Hann hvorki reykir né drekkur svo við höfum ekki áhyggjur af því að það hafi verið óregla á honum. Við heyrðum af því að hann hefði sést í Vestmannaeyjum á laugardeginum," sagði Rúnar.

Prince ferðaðist ekki með KR til Sviss þar sem liðið mætir Basel á morgun en hann átti að vera til reynslu hjá MK Dons í vikutíma. „Hann er á Englandi núna eftir því sem ég best veit. Ég hef ekki haft fréttir af honum síðan um helgina. Við vorum bara með fókusinn á okkar liði, vitandi að hann væri á leið til Englands í vikutíma," sagði Rúnar.