Óvíst hversu alvarleg meiðsli Fabregas eru

Knattspyrnustjórinn Arsene Wenger hjá Arsenal svitnar nú yfir fyrirliða sínum Cesc Fabregas sem meiddist í 4-1 sigrinum á Portsmouth í gær. Fabregas var skipt út af í hálfleik eftir að hafa fundið fyrir óþægindum aftan í lærvöðva.

„Við vitum betur hversu alvarleg meiðslin eru á næsta sólarhring eða svo þegar hann er búinn að láta lækna kíkja á þetta almennilega. Hann var örlítið meiddur fyrir leikinn og síðan versnaði þetta bara í fyrri hálfleiknum þannig að það var ekkert annað í stöðunni en að hann myndi fara út af í hálfleik.

Ef hann hefur rifið eitthvað gæti hann verið frá í þrjár vikur en ef ekki þá verður hann vonandi klár í næsta deildarleik," segir Wenger.