Styttist í að Aquilani sé klár í slaginn með Liverpool

Miðjumaðurinn Alberto Aquilani á enn eftir að spila leik fyrir Liverpool eftir 20 milljón punda félagaskiptin frá Roma síðasta sumar en leikmaðurinn þurfti að gangast undir aðgerð á ökkla í ágúst.

Knattspyrnustjórinn Rafa Benitez hjá Liverpool hefur hins vegar staðfest að ekki sé langt í að hinn 25 ára gamli landsliðsmaður Ítalíu sé klár í slaginn.

„Ég er búinn að vera að tala við lækna og sjúkraþjálfara félagsins og þeir segja mér að Alberto eigi ekki langt í land. Það eina sem hann er ekki byrjaður að gera í þjálfuninni er að sparka í bolta en það styttist í að hann fái grænt ljós á það og þá er ekki langt í hann," segir Benitez í viðtali við Liverpool Echo í dag.