Zenden æfir með Sunderland

Hollendingurinn Boudewijn Zenden er nú að æfa með enska úrvalsdeildarfélaginu Sunderland en hann er sem stendur án félags.

Zenden lék síðast með Marseille í Frakklandi en var áður á mála hjá Barcelona, Liverpool, Chelsea og Middlesbrough.

„Hann mun æfa með okkur í nokkrar vikur á meðan hann finnur sér nýtt félag," sagði Steve Bruce, stjóri Sunderland, í samtali við enska fjölmiðla. „Hann býr yfir mikilli reynslu og við erum ánægðir með að hafa hann."

Umboðsmaður og faðir Zenden, Pierre, hefur gefið til kynna að leikmaðurinn kunni að semja við Sunderland.

Pierre sagði að Sunderland hefði áhuga að fá miðvallarleikmann til liðs við félagið og að sonur sinn kæmi vel til greina.