FIFA bannar Chelsea að versla

Alþjóða knattspyrnusambandið, FIFA, hefur ákveðið að meina Chelsea að versla leikmenn í næstu tveim félagaskiptagluggum.

Þessi harða og óvenjulega refsing kemur til vegna kaupa félagsins á Gael Kakuta frá Lens árið 2007. Ofan á bannið er Chelsea einnig sektað um  680 þúsund pund og þarf þess utan að greiða Lens 113 þúsund pund í miskabætur.

Lens var afar ósátt við hegðun Chelsea í málinu sem lokkaði leikmanninn til sín og hann stóð í kjölfarið ekki við samning sinn við félagið. Það endaði eðlilega með því að hann fór frá félaginu og í raðir Chelsea.

FIFA vill meina að það hafi verið að undirlagi Chelsea sem leikmaðurinn ákvað að svíkja samning og í raun gera allt til að losna frá félaginu.

Kakuta má ekki taka þátt í neinum leikjum Chelsea næstu fjóra mánuðina. Það breytir reyndar litlu fyrir Chelsea þar sem hann leikur aðeins með varaliði félagsins.

Fastlega má gera ráð fyrir því að Chelsea muni áfrýja þessum óvenjulega úrskurði.