Eggert Magnússon orðaður við yfirtöku á West Ham

Breska slúðurblaðið The Sun slær því upp í dag að Eggert Magnússon hafi í hyggju að eignast hlut í West Ham að nýju en hann átti sem kunnugt er lítinn hlut í félaginu þegar Björgólfur Guðmundsson var aðaleigandi þess ásamt því sem Eggert gengdi starfi stjórnarformanns.

Ekki kemur fram í umfjöllunni hvernig Eggert hafi í hyggju á að verða sér út um 100 milljón punda verðmiðann sem settur er á Lundúnafélagið en „kex-kóngurinn" er sagður elska Lundúnafélagið og hafa mikinn vilja til þess að bjarga því.

CB Holdings, móðurfélag West Ham, er að mestu í eigu Straums Burðaráss fjárfestingarbanka en Andrew Bernhardt, framkvæmdarstjóri hjá Straumi, fer nú með hlutverk stjórnarformanns hjá West Ham.

The Sun greinir ennfremur frá því að ásamt áhuga frá Eggerti séu fjárfestingarfyrirtæki frá Asíu og Bandaríkjunum búin að spyrjast fyrir um West Ham.