Eiður Smári orðaður við West Ham ásamt fleirum

Knattspyrnustjórinn Gianfranco Zola hjá West Ham hefur ekki farið leynt með vilja sinn um að fá einn til tvo nýja framherja til Lundúnafélagsins áður en félagsskiptaglugganum lokar 1. september næstkomandi.

Carlton Cole er í raun eini leikfæri framherjinn sem Zola getur notast við ef frá eru taldir nokkrir unglingar og Dean Ashton sem er alvarlega meiddur og óvíst hvort að hann spili nokkurn tímann aftur fyrir félagið.

Útlit er þó fyrir að Zola sé búinn að tryggja sér þjónustu landa síns Alessandro Diamanti frá Livorno á 5,5 milljónir punda en West Ham mun greiða kaupverðið á þremur árum og framherjinn mun að öllu óbreyttu gangast undir læknisskoðun í dag og skrifa undir samning.

Sögusagnir eru hins vegar á kreiki í breskum fjölmiðlum í dag og í gær að West Ham ætli ekki að nema staðar þar og félagið er sagt vera í viðræðum um að fá annað hvort Eið Smára Guðjohnsen frá Barcelona eða Marouane Chamakh frá Bordeaux.

Julio Baptista hjá Roma og Goran Pandev hjá Lazio voru einnig nefndir í þessu samhengi en báðir leikmenn hafa staðfest í dag að þeir séu ekki á leiðinni til West Ham.