Lescott stefnir á topp fjögur sæti með City

Varnarmaðurinn Joleon Lescott var kynntur sem nýr leikmaður Manchester City á blaðamannafundi í morgun eftir að gengið var frá félagsskiptum kappans frá Everton seint í gærkvöld.

Með kaupunum á Lescott á 24 milljónir punda er eyðsla forráðamanna félagsins nú komin upp í 216,5 milljónir punda á einu ári. Lescott sagði á blaðamannafundinum að metnaður City-manna hafi heillað hann og kvaðst fullur tilhlökkunar um að taka þátt í framtíðarplönum félagsins.

„Öll félögin fyrir utan þau „stóru fjögur" eru að reyna að komast í þann hóp og að mínu mati er City í betri stöðu til þess að ná þangað fljótt heldur en Everton. Þess vegna vildi ég breyta til og ég er mjög ánægður með að félagsskiptin hafi gengið í gegn.

Ég vill ekkert tjá mig um ummæli David Moyes [knattspyrnustjóra Everton] í minn garð um hegðun mína og ætla bara að svo stöddu að einblína á jákvæða framtíð mína hjá City," sagði Lescott.