Benitez: Torres þarf að einbeita sér og hætta pirringnum

Knattspyrnustjórinn Rafa Benitez hjá Liverpool hefur hvatt stjörnuframherjann sinn Fernando Torres til þess að einbeita sér að því að spila sinn leik og hætta að pirra sig á mótherjunum.

Torres fær jafnan óblíðar móttökur frá varnarmönnum mótherja Liverpool enda búinn að stimpla sig inn sem einn hættulegasti framherji Evrópu eftir að hafa skorað 38 úrvalsdeildarmörk síðan hann kom á Anfield árið 2007.

Torres hafði hins vegar hægt um sig í 2-1 tapleiknum á móti Tottenham og lét mótlætið eitthvað fara í taugarnar á sér.

„Hann virðist ekki vera jafn einbeittur nú og hann var á fyrsta tímabili sínum með Liverpool og ég hef sagt honum það. Hann verður að hætta pirringnum og einbeita sér að því að bæta sinn leik.

Ég veit að stundum getur verið erfitt fyrir hann að halda haus miðað við þá meðferð sem hann fær frá varnarmönnum hinna liðanna en hann veit að hann verður að taka á því með öðrum hætti en að missa einbeitinguna," segir Benitez á blaðamannafundi fyrir leikin gegn Stoke í kvöld.