West Ham á eftir framherja Livorno

Forsetinn Aldo Spinelli hjá Serie A-deildar félaginu Livorno á Ítalíu hefur staðfest að West Ham hafi haft samband og líst yfir áhuga á að fá framherjann Alessandro Diamanti í raðir félagsins.

Knattspyrnustjórinn Gianfranco Zola hjá West Ham hefur ekki farið leynt með áhuga sinn á fá leikmenn til að styrkja sóknarleik Lundúnafélagsins og er sagður sjá landa sinn Diamanti sem rétta manninn til þess að spila við hlið Carlton Cole í framlínu West Ham.

Hinn 26 ára gamli Diamanti er metinn á 8,5 milljónir punda en ef marka má orð Spinelli er West Ham ekki búið að ná neinu samkomulagi við Livorno.

„West Ham er búið að láta í ljós áhuga sinn á Alessandro en enn er langt í land með að samningar náist um kaupverð. Leikmaðurinn hefur hins vegar mikinn áhuga á að fara til Englands og spila í ensku úrvalsdeildinni. Við sjáum til hvað gerist á næstu dögum," segir Spinelli í samtali við Sky Italia.