Ancelotti: Mjög mikilvægt að við höldum Cole

Knattspyrnustjórinn Carlo Ancelotti hjá Chelsea vonast til þess að miðjumaðurinn Joe Cole muni bætast í hóp með þeim Salomon Kalou, Alex, John Terry, Ashley Cole, Didier Drogba og Michael Mancienne og skrifa undir nýjan samning við Lundúnafélagið.

Alþjóðaknattspyrnusambandið FIFA dæmdi Chelsea sem kunnugt er í eins og hálfs árs bann til kaupa nýja leikmenn og því er enn mikilvægara en áður, ef bannið mun standa, að félagið haldi í núverandi leikmenn sína.

„Ég tel að það sé mjög mikilvægt að við höldum Cole áfram því hann er, líkt og aðrir leikmenn sem við höfum samið við upp á síðkastið, framtíðarleikmaður hjá Chelsea. Við erum ánægðir með núverandi leikmannahóp og gerum allt til þess að halda honum saman áfram," er haft eftir Ancelotti á blaðamannafundi í dag.