Atletico Madrid á eftir Eboue og Merida

Samkvæmt spænskum fjölmiðlum er spænska félagið Atletico Madrid að búa sig undir að bjóða í miðjumennina Emmanuel Eboue og Fran Merida hjá Arsenal.

Hinn 26 ára gamli Eboue er metinn á 6 milljónir punda og var sterklega orðaður við Fiorentina og Roma í sumar en hefur verið að spila vel með Arsenal á yfirstandandi tímabili og talið er að Arsenal sé búið að bjóða honum nýjan fjögurra ára samning.

Hvað varðar hinn 19 ára gamla Merida þá verður að teljast ólíklegt að knattspyrnustjórinn Arsene Wenger hjá Arsenal vilji sleppa hendinni af honum þrátt fyrir að leikmaðurinn hafi ekki enn náð að festa sig í sessi í leikmannahópi Arsenal.

Núgildandi samningur Merida við Arsenal rennur út næsta sumar og talið er næsta víst að Lundúnafélagið muni bjóða honum nýjan samning en hann skrifaði undir samning við félagið á 17 ára afmælisdegi sínum eftir að hafa áður verið í unglingaliði Barcelona líkt og Cesc Fabregas.