Zenden genginn í raðir Sunderland

Hollendingurinn Boudewijn Zenden hefur gengið formlega í raðir Sunderland en hann hefur æft með liðinu undanfarnar vikur.

Zenden var án félags eftir að samningur hans við Marseille í Frakklandi rann út síðastliðið sumar.

Hann er 33 ára gamall og hefur á sínum ferli leikið til að mynda með Liverpool, Barcelona, Chelsea og Middlesbrough.

„Frammistaða hans á æfingum sannfærði mig um að hann gæti gegn mikilvægu hlutverki í okkar liði í vetur," sagði Steve Bruce, stjóri Sunderland. Zenden samdi til loka tímabilsins en aðilar eiga möguleika á að framlengja þá samninginn um eitt ár til viðbótar.

„Það var strax ljóst að hann var í mjög góðu formi og þetta gekk allt saman mjög fljótt fyrir sig."