Chris Coleman ósáttur við KSÍ

Chris Coleman, knattspyrnustjóri Coventry, er afar ósáttur við að Aron Einar Gunnarsson hafi spilað allar 90 mínúturnar í vináttulandsleik Íslands og Suður-Afríku á þriðjudagskvöldið.

Aron Einar hafði átt við meiðsli að stríða og missti af þeim sökum af leik Íslands og San Marinó í undankeppni EM U-21 landsliða fyrir viku síðan.

Fram kemur í frétt Coventry Telegraph um málið að Ólafur Jóhannesson landsliðsþjálfari hafi hunsað tilmæli lækna Coventry um að Aron Einar þurfti á hvíld að halda.

„Ég er mjög vonsvikinn svo ekki sé meira sagt," sagði Coleman. „Maður er að reyna að byggja upp traust meðal landsliðsþjálfaranna og mér fannst þetta afar eigingjarnt af þeirra hálfu."

„Ég er þar með ekki að gagnrýna Aron því allir leikmenn vilja spila fyrir sín landslið. Ég get ekki annað en velt fyrir mér hvort þeir hafi beitt strákinn þrýstingi."

„Við létum þau tilmæli fylgja að Aron gæti ekki spilað þar sem hann væri meiddur. Ég ræddi við lækni íslenska landsliðsins sem sagði að Aron þyrfti að koma til Íslands. Við samþykktum það en það kom okkur svo mjög á óvart að hann spilaði allan leikinn."

Blaðamaður Vísis ræddi við Ólaf fyrir leikinn gegn Suður-Afríku og spurði út í stöðu Arons. Þá sagði Ólafur að læknir íslenska landsliðsins hafi sagt að Aron væri leikfær. Því hafi sú ákvörðun verið tekin að láta hann æfa og spila með landsliðinu.