Capello kallar á Cahill - Ferdinand meiddur

Fabio Capello, landsliðsþjálfari Englands, hefur ákveðið að velja varnarmanninn Gary Cahill hjá Bolton í landsliðshópinn sem mætir Kazakhstan í undankeppni HM 2010 í stað Rio Ferdinand hjá Manchester United sem er meiddur á kálfa.

Ferdinand gæti þó verið til í slaginn að nýju þegar England mætir Andorra í næstu viku.

Cahill átti frábært tímabil með Bolton á nýafstaðinni leiktíð en hann keppir við Matthew Upson og Joleon Lescott um sæti við hlið John Terry í hjarta varnar enska landsliðsins í leiknum.

Gary Megson, knattspyrnustjóri Bolton, gagnrýndi Capello harðlega síðasta vetur fyrir að hunsa Cahill þegar hann valdi landsliðshópa fyrr í undankeppninni en Cahill hefur aldrei spilað fyrir A-landslið Englands en á að baki leiki með unglingalandsliðum Englands.

„Ég átti mjög gott tímabil með Bolton og hef lagt hart að mér að bæta minn leik. Þetta er frábært tækifæri fyrir mig að fá að taka þátt í þessu verkefni," segir Cahill í viðtali á opinberri heimasíðu Bolton.