Ívar: Reading getur enn komist upp í úrvalsdeildina

Búist er við því að varnarmaðurinn Ívar Ingimarsson verði leikfær að nýju með Reading um miðjan september en félagið hefur farið vægast sagt illa af stað á þessu keppnistímabili í ensku b-deildinni.

Reading hefur aðeins fengið tvö stig úr fyrstu fjórum leikjum sínum en það er versta byrjun félagsins í deildarkeppni í tólf ár. Ívar er þó bjartsýnn á að félagið geti aftur komist í deild þeirra bestu.

„Ég hef heyrt mikið tal um að við eigum ekki lengur möguleika á að komast upp eftir þess byrjun en það þýðir ekki að hlusta á svoleiðis tal. Við leikmennirnir verðum að hafa trú á sjálfum okkur og við vitum að allt tekur sinn tíma. Á síðasta keppnistímabili vorum við alveg við toppinn í janúar en það skilaði litlu þegar upp var staðið í lok tímabilsins.

Þetta eru 46 leikir og þetta kemur allt saman í ljós þegar þessir leikir hafa verið spilaðir. Það hjálpar heldur ekkert að fara í felur með að tvö stig úr fjórum leikjum er ekki viðunnandi en við erum með ungt lið og þurfum smá tíma. Ég er sannfærður um að við náum að snúa þessu við og fara að hala inn stigum," segir Ívar vongóður í viðtali við vefmiðilinn getwokingham.