Murray og Sharapova úr leik í París

Bretinn Andy Murray féll í dag úr leik á Opna franska meistaramótinu í tennis er hann tapaði fyrir Fernando Gonzalez frá Chile í fjórðungsúrslitunum. Maria Sharapova er einnig úr leik.

Gonzalez vann fyrsta settið örugglega, 6-3, en Murray náði að svara fyrir sig og jafna metin í næsta setti.

En þá tók Gonzalez aftur öll völd í viðureigninni og vann síðustu tvö settin 6-0 og 6-4.

Murray er í þriðja sæti á styrkleikalista mótsins en Gonzalez í því tólfta. Vonbrigðin eru því mikil fyrir Skotann sem hefur enn ekki unnið slemmumót á ferlinum.

Fyrr í dag komst Robert Söderling áfram í undanúrslitin og mætir hann Gonzalez í undanúrslitunum. Báðir eru í fyrsta sinn í undanúrslitum stórmóts.

Fjórðungsúrslitunum í einliðaleik karla lýkur á morgun með viðureign Juan Martin del Potro og Tommy Robredo annars vegar og hins vegar Roger Federer og Gael Monfils.

Sharapova átti aldrei möguleika í sinni viðureign í fjórðungsúrslitunum gegn Dominiku Cibulkovu frá Slóvakíu. Sú síðarnefnda vann, 6-2 og 6-0, og mætir Dinöru Safinu frá Rússlandi í undanúrslitunum.

Síðari viðureignirnar í fjórðungsúrslitum fara fram á morgun. Þá mætast Sorana Cirstea og Samantha Stosur annars vegar og Svetlana Kuznetsova og Serena Williams hins vegar.