Aston Villa sagt nálægt því að fá Dunne - óvissa með Warnock

Fastlega var búist við því að Richard Dunne myndi færa sig um set frá Manchester City eftir að Joleon Lescott gekk formlega í raðir félagsins og samkvæmt breskum fjölmiðlum er írski landsliðsmaðurinn nálægt því að ganga í raðir Aston Villa á 6 milljónir punda.

Knattspyrnustjórinn Martin O'Neill hjá Aston Villa hefur lengi verið að leita eftir reynslumiklum varnarmanni til þess að fylla skarð Martin Laursen sem varð að leggja skóna á hilluna vegna þrálátra meiðsla og virðist nú hafa fundið sinn mann í hinum 29 ára gamla Dunne.

Þá hafa forráðamenn Aston Villa staðfest að félagið eigi í viðræðum við Blackburn vegn vinstri bakvarðarins Stephen Warnock knattspyrnustjórinn Sam Allardyce hjá Blackburn hefur látið hafa eftir sér að leikmaðurinn sé ekki á förum frá félaginu nema Aston Villa sé tilbúið að borga uppsett verð sem talið er nema um 10 milljónum punda. Óvíst er því hvort af félagsskiptum leikmannsins verður.