Hughes: Adebayor er hamingjusamur hjá okkur

Mark Hughes, stjóri Man.City, segir að Emmanuel Adebayor sé farinn að njóta þess að spila fótbolta á ný þar sem hann sé í liði sem hafi möguleika á að gera frábæra hluti. Einnig af því að hann sé að spila fyrir stuðningsmenn sem kunni að meta hann.

„Það leynir sér ekki að hann er afar hamingjusamur hjá okkur. Hann nýtur þess að spila fótbolta á ný með góðum leikmönnum og fyrir stuðningsmenn sem elska hann. Það vantaði kannski hjá honum áður," sagði Hughes en Adebayor tryggði City sigur á Portsmouth í dag.

„Mér fannst hann vera frábær í þessum leik. Það var mikið neikvætt sagt um persónu hans þegar hann kom til okkar. Ég hef ekki séð þessar neikvæðu hliðar á honum," sagði Hughes ánægður með sinn mann.