Dramatískur sigur hjá Everton

Everton fékk sín fyrstu stig á þessari leiktíð þegar Wigan kom í heimsókn á Goodison Park. Everton vann leikinn, 2-1, með marki úr vítaspyrnu í uppbótartíma.

Eftir frekar rólegan fyrri hálfleik þá kom Paul Scharner liði Wigan yfir á 57. mínútu. Markið sló leikmenn Everton ekki út af laginu sem byrjuðu að sækja af krafti og uppskáru jöfnunarmark á 62. mínútu.

Það skoraði Louis Saha með laglegum skalla.

Nokkuð fjör var undir lok leiksins er bæði lið reyndu að krækja í öll stigin. Á 93. mínútu fiskaði Jo síðan víti fyrir Everton.

Spyrnuna tók Leighton Baines og hann skoraði af öryggi og tryggði Everton um leið öll stigin í leiknum.