Ferguson: Það kom mér ekki á óvart að þeir mættu með varaliðið

Sir Alex Ferguson, stjóri Manchester United, hrósaði baráttuglöðum Wolves-leikmönnum fyrir frammistöðu sína á Old Trafford í kvöld en United vann þá 3-0 sigur á varaliði Wolves og komst upp að hlið Chelsea á toppnum.

„Þetta var erfitt kvöld og þeir gerðu þetta mjög erfitt fyrir okkur, pressuðu boltann allan tímann og tækluðu allt sem var í boði. Ég tel að þeir hafi staðið sig mjög vel í þessum leik vitandi það að þarna var varaliðið þeirra að spila," sagði Sir Alex Ferguson, stjóri Manchester United eftir 3-0 sigur á Wolves í kvöld.

„Það kom mér ekki á óvart að Mick tefldi fram varaliði í kvöld því þeir eiga mjög mikilvægan leik á móti Burnley um næstu helgi. Þetta varð þægilegt fyrir okkur um leið og við skoruðum fyrsta markið okkar," sagði Alex Ferguson eftir sinn 900. deildarleik sem stjóri Manchester United.