„Er því miður kominn í jóla­frí“

„Það er alltaf gott að koma heim og fá aðeins vindinn í andlitið. Svo finnur maður það í samfélaginu, hvort sem er í sundi eða úti að labba, að það er að byrja smá tilhlökkun. Þá fær maður kitl í magann að það fari að koma að þessu loksins og geta farið að taka á því,“ segir Janus Daði, sem er í leikmannahópi Íslands fyrir EM í janúar, sem opinberaður var í dag.

„Það lítur út fyrir að flestir séu í toppformi. Við höfum verið lengi saman, kjarninn, mörg mót sem við höfum gengið í gegnum sem hóp þar sem við höfum fengið að þjást svolítið. Ég held það sé ró yfir okkur komandi inn í verkefnið. Við vitum að það getur verið stutt á milli. Svo það eina sem við getum stýrt er að undirbúa okkur vel og vinna þessa handboltaleiki á þeim 60 mínútum sem við fáum,“ segir Janus.

Vali á hópi sem þessum fylgja þó ýmsar tilfinningar fyrir marga. Til að mynda eru Stiven Tobar Valencia og Sigvaldi Björn Guðjónsson utan hópsins sem heldur utan. Janus þekkir sjálfur að vera skilinn eftir enda landsliðið í fyrsta sæti hjá mörgum.

„Þetta er alltaf hundfúlt. Ég man að ég var sjálfur ekki með 2019. Við eyðum öllu árinu í að undirbúa okkur æfa. Ég held ég tali fyrir hönd allra í liðinu að landsliðið er það sem okkur þykir vænst um og er efst í huga. Eigum við ekki að segja að með allri þjáningunni fylgi eitthvað gott með líka,“ segir Janus.

Óljóst var með þátttöku hans um tíma þegar hann varð fyrir slæmum meiðslum í haust. Hann komst hins vegar af stað með félagi sínu Pick Szeged í Unverjalandi áður en jólafríið hófst þar ytra.

„Nú er ég bara ferskur og ekkert meiddur. Ég var að detta aftur í leikform en er því miður kominn í jólafrí og get ekki verið að púla með liðinu mínu úti. En ég er þá bara hérna heima með gott fólk í kringum mig sem aðstoðar mig. Ég verð í toppstandi þegar við byrjum 2. janúar.“