Kaupþing búið að losa sig við flesta bíla

Finnur Sveinbjörnsson bankastjóri Nýja Kaupþings segir að bankinn sé búinn að losa sig við flesta bíla sem fyrri stjórnendur hjá bankanum höfðu. Þegar Nýi bankinn tók yfir var strax farið í að losa bíla og það kláraðist upp úr áramótum. Engin útsala var á bílaflota bankans en Finnur fagnar því að bankinn hafi náð að selja, því ekki sé auðvelt að losa sig við dýra bíla í dag.

 

 

„Það var strax farið í það í október/nóvember að selja bíla því margir stjórnendur fóru aldrei yfir í nýja bankanna. Þeir skyldu eftir sig bíla sem þeir höfðu haft afnot af," segir Finnur.

 

 

Bankinn leitaði til tveggja bílasala eftir verðmati áður en bílarnir voru seldir. „Um áramótin urðu enn frekari hreyfingar í stjórnendahópnum hjá okkur og þá gátum við losað um fleiri bíla. Þeir bílar seldust ekki hratt en síðan kom það upp að við gátum selt þá alla í heilu lagi, við nýttum okkur það."