Benitez: Við sjáum til hvað gerist í apríl og maí

Rafael Benitez , stjóri Liverpool, er ekki tilbúinn að afskrifa titilvonir síns liðs þrátt fyrir 0-2 tap á móti Chelsea á Brúnni í dag. Þetta var þriðja tap Liverpool á tímabilinu og lið sem tapar 3 af fyrstu 8 leikjum sínum hefur ekki tekist að vinna enska titilinn síðustu 40 ár.

„Við spiluðum ekki illa á móti góðu liði. Við vorum nægilega góðir varnarlega og þeir sköpuðu sér ekki mikið af færum. Ef þú gerir mistök á móti sterku liði þá er þér refstað með marki," sagði Benitez. "Ég vil ekki kenna neinum leikmanni um hvernig fór og ég er sáttur með framlag minna manna," sagði Benitez.

„Við gerðum mikið af jafnteflum í fyrra og þá voru allir að tala um þessi jafntefli þó að við hefðum bara tapað tveimur leikjum. Nú erum við að vinna fleiri og tapa fleirum og kannski náum við á endanum í fleiri stig," sagði Benitez.

„Við einbeitum okkur bara að næsta leik. Það er mikilvægt að halda ró sinni, halda vinnunni áfram og reyna að bæta sig. Toppliðin munu tapa stigum á móti öðrum liðum á þessu tímabili og svo við munum bara halda áfram. Þetta er langhlaup og við skulum sjá til hvað gerist í apríl og maí," sagði Benitez.