Ancelotti: Mótlætið bugar okkur ekki

Carlo Ancelotti, stjóri Chelsea, hrósaði þrautseigju leikmanna sinna sem komu til baka gegn Sunderland í kvöld og lönduðu sigri.

„Það gerist iðulega í fótbolta að lið lendi í mótlæti og þá er nauðsynlegt að bregðast rétt við í stað þess að verða hræddur. Það þarf að stýra leikjum og við höfum gert nákvæmlega það í þessum þremur leikjum okkar. Þó svo við séum undir þá stýrum við leiknum," sagði Ítalinn.

Ancelotti var sérstaklega ánægður með Deco en lengi vel var talið að hann myndi yfirgefa herbúðir Chelsea.

„Hann er ekki að fara neitt og vill ekki fara. Við viljum heldur ekki missa hann frá okkur. Hann er að leggja hart að sér og er ákveðinn í að ná árangri með okkur. Þetta tímabil er mikilvægt fyrir hann vegna HM og hann lék afar vel í kvöld."