Diamanti genginn í raðir West Ham

Leit knattspyrnustjórans Gianfranco Zola hjá West Ham eftir nýjum framherja hefur loksins borið árangur en Lundúnafélagið hefur staðfest félagsskipti Ítalans Alessandro Diamanti frá Livorno.

Kaupverðið er ekki gefið upp en búist er við því að West Ham þurfi að reiða fram í kringum 5,5 milljónir punda fyrir hinn 26 ára gamla sóknarmann. Diamanti skrifaði undir fimm ára samning við West Ham í dag eftir að hafa staðist læknisskoðun og kvaðst vera í skýjunum með að vera kominn til félagins.

„Ég er mjög ánægður með að vera orðinn leikmaður West Ham og fá tækifæri til þess að spila fyrir Zola. Þetta er stórt félag sem hefur ríka hefð til þess að spila skemmtilegan fótbolta og ég hlakka mjög til þess að sýna stuðningsmönnum félagsins hvað ég get," segir Diamanti í viðtali á opinberri heimasíðu West Ham.