Hodgson vildi ekki fá Campbell

Roy Hodgson, stjóri Fulham, hefur greint frá því að hann hafnaði tækifæri til að semja við Sol Campbell til liðs við félagið nú í sumar.

Campbell var orðaður við mörg félög í ensku úrvalsdeildinni í sumar en samdi síðan við enska D-deildarliðið Notts County.

Hann lék einn leik með félaginu en fór svo fram á að rifta samningi sínum við Notts County. Campbell þarf nú að bíða til áramóta þar til hann getur samið við nýtt félag.

„Okkur stóð til boða að semja við hann eins og get ég vel ímyndað mér að flest félögum hafi einnig staðið það til boða," sagði Hodgson.

„En við erum með ungan dreng hjá okkur sem heitir Chris Smalling og er nítján ára gamall. Hann spilar með enska U-21 landsliðinu og á mjög bjarta framtíð."

„Við erum líka með Chris Baird í okkar röðum sem mér finnst mjög fínn leikmaður. Ég tel að það myndi vera rangt að fá leikmenn til okkar sem eru á síðustu metrunum. Það myndi bitna á strákum eins og Chris Smalling."