Tevez og Messi byrja gegn Brasilíu

Diego Maradona hefur staðfest að þeir Carlos Tevez og Lionel Messi verða saman í fremstu víglínu þegar að Argentína mætir Brasilíu í undankeppni HM 2010 annað kvöld.

Um gríðarlega mikilvægan leik er að ræða. Brasilía getur tryggt sér sæti á HM í Suður-Afríku með sigri og hagstæðum úrslitum úr öðrum leikjum. Tapi Argentína er staða liðsins slæm og alls ekki víst að það komist til Suður-Afríku.

Óvíst var hver myndi spila með Messi í sókninni. Vangaveltur um hvort að gamli refurinn Martin Palermo fengi tækifærið nú, eða Lisandro Lopez hjá Lyon eða Sergio Aguero, leikmaður Atletico Madrid og tengdasonur landsliðsþjálfarans, Diego Maradona.

En Maradona hefur nú tilkynnt byrjunarliðið sitt. Það er þannig skipað: Mariano Andujar, Javier Zanetti, Nicolas Otamendi, Sebastian Dominguez, Gabriel Heinze, Maximiliano Rodriguez, Javier Mascherano, Juan Sebastian Veron, Jesus Datolo, Lionel Messi og Carlos Tevez.

Reyndar tilkynnti hann ekki byrjunarliðið sjálfur. Blaðamaður taldi upp liðið á blaðamannafundi og Maradona staðfesti að þetta væri rétt byrjunarlið.

„Við þurfum að kæfa Brasilíu," sagði Maradona. „Við verðum að halda þeim við sitt mark og passa sérstaklega upp á Kaka, Robinho og Luis Fabiano. Þeir mega ekki ná skyndisóknum á okkur og við verðum að passa fráköstin mjög vel."