Leita læknis eftir neyslu orkudrykkja

Töluvert er um að fólk leiti sér læknisaðstoðar eftir að hafa drukkið svokallaða orkudrykki. Þetta segir Ófeigur T. Þorgeirsson, yfirlæknir á slysa- og bráðasviði. Hann segir nauðsynlegt að fólk lesi innihaldslýsingar og virði ráðlagðan hámarksskammt. „Þetta eru mjög varasamir drykkir í of miklu og of hröðu magni,“ segir Ófeigur um orkudrykki almennt.

Ákveðið var fyrir skömmu að banna neyslu orkudrykkja í félagsmiðstöðvum Kópavogs eftir að ungmenni höfðu gert sér að leik að fá sér marga í einu.

Segir Arna Margrét Erlingsdóttir, verkefnisstjóri tómstundamála í Kópavogi, að sérstaklega séu lítil skot sem nýlega komu á markað varasöm. Þau er auðvelt að innbyrða hratt og í miklum mæli og geta afleiðingarnar orðið alvarlegar eftir því. Orkudrykkurinn sem rætt er um er svonefnt Burn orkuskot en í innihaldslýsingu frá Vífilfelli segir: „Getur innihaldið snefil af hnetum og jarðhnetum. Eitt skot (50 ml) á dag. Neysla má ekki fara yfir dagskammtinn. Geymist þar sem börn ná ekki til. Þessi vara er ekki fyrir börn undir 14 ára aldri, barnshafandi konur og persónur sem eru viðkvæmar fyrir koffeini. Notið ekki sem valkost á móti fjölbreyttu fæði. Blandið ekki saman við áfengi.“

Arna segir að komið hafi fyrir að krakkarnir hafi jafnvel drukkið þrjú svona glös á skömmum tíma. Ungmenni átti sig oft ekki á mikilvægi þess að kanna innihald og ráðlagðan dagskammt og haldi að þau verði uppfull af orku við að drekka mikið magn. Þau komist þó oft síðar að því að mikil vanlíðan er fylgifiskur ofskömmtunar.

Meðal einkenna sem fólk kvartar yfir þegar það leitar sér aðstoðar hjá lækni vegna orkudrykkja segir Ófeigur vera: Hraður hjartsláttur, almenn vanlíðan, sviti, höfuðverkur og svo hár blóðþrýstingur, þótt fólk finni oftast ekki fyrir síðastnefnda einkenninu þá sé hár blóðþrýstingur óneitanlega algengur fylgikvilli orkudrykkjaþambs.

Arna hefur sent bréf til allra foreldra 13 til 16 ára ungmenna vegna málsins og hvetur starfsmenn félagsmiðstöðva og foreldra alla til að hafa vakandi auga með þessu og ræða við unglingana um afleiðingar af ofneyslu þessara drykkja.karen@frettabladid.is