Arsenal íhugar næstu skref í Eduardo-málinu

Forráðamenn Arsenal eru vægt til orða tekið svekktir með tveggja leikja bannið sem Eduardo fékk fyrir dýfuna gegn Celtic í Meistaradeildinni.

Forráðamenn Arsenal segjast bíða spenntir eftir rökstuðningi frá UEFA fyrir banninu og ekki síst bíða þeir eftir að sjá áætlun frá UEFA um hvernig þeir muni haga sér í slíkum málum í framtíðinni.

Í yfirlýsingu frá félaginu segir einnig að ef þetta bann eigi að standa verði UEFA að standa sína plikt og banna alla aðra leikmenn sem verða uppvísir að því að dýfa sér.

Mönnum er því líklega hollast að standa í fæturna í vetur ef refsingin verður alltaf svona hörð.

Arsenal hefur þrjá daga til þess að áfrýja dómnum og félagið mun ekki taka ákvörðun fyrr en skýrslan frá UEFA berst þeim.