Hefði Liverpool átt að kaupa Eið?

Bloggari á fréttasíðunni Soccerlens heldur því fram að Liverpool og Blackburn hafi misst af kjarakaupum þegar að Eiður Smári Guðjohnsen var seldur frá Barcelona á mánudaginn.

Franska liðið AS Monaco keypti Eið á tvær milljónir evra og segir bloggarinn í færslu sinni það vera ekki mikið fyrir jafn reynslumikinn leikmann og Eið Smára, sérstaklega miðað við að Wolves greiddi 6,5 milljónir fyrir Kevin Doyle fyrr í sumar. Færsluna má lesa hér.

Hann segir að bæði Liverpool og Blackburn þurfi sárlega á sóknarmönnum að halda og að Eiður hefði reynst þessum liðum góður liðsstyrkur.

Sam Allardyce er stjóri Blackburn en hann var hjá Bolton þegar að Eiður Smári lék þar. Bloggarinn bendir á að félagið eigi pening eftir að það seldi Roque Santa Cruz til Manchester City.

Liverpool þurfi einnig sárlega á sóknarmanni sem geti annað hvort spilað með eða í staðinn fyrir Torres ef annað hvort hann eða Steven Gerrard meiðast.