Babel opinn fyrir því að fara aftur til Ajax

Ryan Babel, leikmaður Liverpool, segir að hann þurfi líklega að leita annað til að fá að spila knattspyrnu reglulega.

Babel nefnir sitt gamla félag, Ajax, í því samhengi og að hann gæti mögulega farið þangað á lánssamningi um næstu áramót.

Babel kom frá Ajax til Liverpool fyrir tveimur árum en hefur ekki náð að vinna sér fast sæti í byrjunarliðinu á þeim tíma. Hann var í byrjunarliði Liverpool gegn Tottenham í fyrstu umferð tímabilsins en hefur síðan þá aðeins komið við sögu sem varamaður í einum leik.

Hann segir í samtali við hollenska fjölmiðla að ekki hafi verið staðið við loforð sem honum voru gefin.

„Ég hefði átt að fá fleiri mínútur og fleiri tækifæri en ég missti sætið mitt strax eftir fyrsta leikinn," sagði Babel.

Hann vill fá að spila meira til að auka líkurnar á því að hann fái að spila með hollenska liðinu á HM í Suður-Afríku á næsta ári.

„Ég helt að hálft tímabil með Ajax væri ekki slæm hugmynd með tilliti til heimsmeistarakeppninnar. Ég get verið góð viðbót við leikmannahóp Ajax."

„Það kom ekki til greina að lána mig nú í sumar en við erum sammála um að endurmeta ástandið í janúar."